БАҚ: Израиль Газадағы мектепке әуе соққысын жасады – 20 адам қаза тапты
21 қыркүйек күні Израиль әуе күштері Газа секторының Зейтун ауданына әуеден соққы жасап, онда мектеп ғимаратында орналасқан адамдар зардап шекті. Бұл мектеп, негізінен, соғыс әрекеттерінен бас сауғалаған бейбіт тұрғындарды паналататын орын болған.
Палестинаның Safa ақпарат агенттігінің мәліметі бойынша, соққы нәтижесінде кемінде 20 адам, оның ішінде әйелдер мен балалар қаза тапқан.
Израиль тарапы бұл ғимаратты нысанаға алуда ХАМАС тобының командалық орталығы болғанын және мектепті әскери мақсатта пайдаланғанын мәлімдеді. Бұл айыпты растаған Израиль Қорғаныс күштері ХАМАС мүшелерінің ғимаратта болғанын алға тартты. Алайда жергілікті дереккөздер мен куәгерлер мектеп ішінде тек бейбіт тұрғындар болғанын айтады.
Бұл оқиға аймақтағы қақтығыстың шиеленісуінің жалғасы болып отыр. Израиль бұған дейін Бейруттың маңындағы бірнеше аймаққа да әуе соққыларын жасаған болатын, оның салдарынан 12 адам көз жұмды. Палестина мен Израиль арасындағы ұзаққа созылған қақтығыс бейбіт тұрғындардың ауыр зардап шегуіне әкеп соғуда.
Айта кету керек, халықаралық ұйымдар мен БҰҰ аймақтағы зорлық-зомбылықты тоқтатуға шақырғанымен, Газа секторындағы қақтығыс жалғасып келеді, нәтижесінде гуманитарлық дағдарыс тереңдеп, азық-түлік пен медициналық көмек тапшылығы күшейіп отыр